قسم كتابات ساخرة

هبة الله سعيد زايد

  جيل “فقر“

بالطبع نحن جيل ينطبق علينا وصف “فقر“ ولا نستطيع أن نثبت غير ذلك فكل الأحداث منذ أواخر الثمانينيات تؤيد ذلك الرأي و تدعمه بأدلة و آخر هذه الأدلة عندما قمنا بثورة تحرير للبلاد وتجريد للعقول من الصمت والخضوع أفشلها لنا جيل آبائنا الذي لم يستطع فعل أي شئ في زمنه وأتى الآن لمنعنا نحن أن نفعل ... هل تذكروا في ١٩٩٢ عام ولادة الكثير من هذا الجيل حدث أقوى زلزال مر على مصر في الحقبة التاريخية الأخيرة .. بعد مرور اعوام عديدة على الغاء “سنة ستة“ تذكروا اعادة تطبيقها على نصف الجيل تقريباً ، ولدنا جميعاً في عصر ظلم وكبت للحريات ولم نستطع أن نطالب بحقنا في ديمقراطية سليمة ، عانينا من نظام تعليم فاشل يساعد على نشر الغباء و التبلد ولا نستطيع تغييره واذا طالبنا بالتغيير نجد التغيير حدث ولكن للأسوأ .. قليل منا من هم درسوا التخصص الذي أرادوه وأقل منهم هم من عملوا في مجال دراستهم فالدراسة الجامعية فى مصر ليست متخصصة ولكنها “حشو كتب“ والمناهج ليس لها علاقة ببعضها البعض .. و عندما ثورنا على جميع هذه الأوضاع ، عندما قمنا بثورة تحدث عنها العالم بأسره سرقتها منا عصابة الإخوان ولكن الذين دفعوا ثمنها هم شباب جيلنا وخسروا حياتهم ولم يستطع أحد أن يسترد حقوقهم من انظمة الدولة الظالمة .. ولكن إذا كنا بالفعل جيل فقر فإن جيل آباؤنا جيل ضعف وكل ما نعانيه الآن هم من تسببوا فيه بخوفهم من محاربة الظلم ، بسكوتهم عن المطالبة بحقهم في دولة ديمقراطية ونظام حكم عادل ..

نوران فكري محمد محمد

Face book  دة و لا تلقيح كلام ؟!!

* اكيد مارك لما عمل facebook  مكنش يقصد ان الناس تستخدمه كدة ..

* مش كل  الناس بتستخدم ال facebook   استخدامه الصح .. يعنى لو اتنين مرتبطين لازم مبدأيا كدة يعملوا in relation ship  او engaged  و نعد احنا نتفرج على تلقيح الكلام .. الكلام دة بأه حلو او وحش المهم ان باقى الناس بتتفرج علىهم و بتعرف اخبارهم من ال  posts  متخانقين و لا متصالحين .. بيحبوا بعض اوى و لا نص و نص ..

* و يا سلام بأة لو فى بنتين اتخانقوا و هما الاتنين موجودين friends عند بعض .. تبدأ بأة وصلة تلقيح الكلام .. اللى غالبا بينتهى فى الاخر ب remove  او block  ..

* و لو اتنين صحاب واحد منهم عاوز يعرف التانى انه بيحبه اوى .. مفيش اكتر من posts  الحب فى الصحاب .. يعنى " صحبى اللى كتفه فى كتفى بيخلينى مطمن " و tag  بأة لصحبه دة ..

* و اى حد عاوز يقول اى حاجة لأى حد بتوصل .. لأنه كله فى الاخر .. تلقيح كلام ...

* و اصلا هى ال status  ايه غير شوية تلقيح كلام !!!!

   ندى عصام مصطفى السيد

مذكرات التمرد على إنحدارنا إخلاقيا 

هننضف إمتا 

بيشغل تفكيري أوي الناس اللي بتتف وتعمل بيبي في الشارع

هو إحنا عشان مصريين لازم نتميز عن جميع المجتمعات بقرفنا ؟

طب ليه تعمل كده في الشارع لما ممكن تعمل الحاجات دي في الإماكن المخصصة للتفافة والبيبي؟

لازم يعني متففه في كل خطوة في الشارع؟

وياريتهم بيتفوا على جنب كده مثلا

لا حاشا وماشا

دول لازم يتفاو في النص كده وممكن كمان التفة دي تيجي فيك عادي يا معلم

اما بقا الناس اللي بتعمل بيبي دول مش هيموتوا موتة طبيعية ابدا

ولما توصل بيك الامور انك تعمل بيبي على الحيطة اللي هي ظهر المسجد يبقا أنت بجد كده عديت كل مراحل قلة الأدب

طب ما أنت مسلم والأذان اهو بيأذن في الوقت اللي انت واقف تعمل فيه كده طب ما تدخل تصلي والحمام موجود اهو جوا المسجد يعني

هو إحنا وصلنا لكده ازززززززززززززززززززززاي؟ 

المصري اصبح ماركة مسجلة فعلا في عدم النظافة 

الميكروباص خلى الناس روخاص 

كسواق ميكروباص مصري بجد

لازم تشغل اغاني شعبية وتحت الشعبية كمان

وكمان لازم تبقا مصطبح يامعلم ومبلبع الحاجات الحلوة دي اللي بتظبطك

زي الحشيش والبانجو والترامادول والباقي مجربتهوش انا بصراحه 

اصل انت لو مضربتش الحاجات دي هتتخانق ازاي وتعمل حوادث ازاي؟ 

مع احترامنا لجميع سائقي الميكروباصات المحترميين"اللي هما بقو شبه مختفيين او انقرضوا " 

و على رأي المثل

محدش بوظك يابلدي غير سواقين الميكروباص والإخوان 

شعب ملافظ 

زمان كانو بيقولولنا الملافظ سعد

لكن واضح ان سعد مات من زمان اوووي 

عشان تتكلم وتبقا جامد أووي

لازم تقول كلام يوحي بقلة الأدب والإباحه 

 بجد الكلام ده انتشر بطريقة بنت لاذينة

بقا اي حد يقول الفاظ وحشه سواء كان بنت او ولد او حتى طفل

خصوصا لما تكون بتتفرج على برنامج معين أنت شايف إن اللي بيتكلم قدامك ده مثلك الأعلى

بالظبط زي برنامج "البرنامج" لباسم يوسف واللي بفضله انتشر الكلام ده

المشكلة إن باسم يوسف في الاول كان بينتقد الناس اللي بتقول الفاظ غير لائقة

لكن بعد كده بقا هو اللي بيقول الكلام ده وبقا كمان بيقوله أكتر منهم 

انت لو جيت تنتقد حد ع الكلام  ده هيقولك انت جاهل او مبتفهمش

هيقولك كمان إن انت اللي قليل الأدب

اصل احنا  في مصرلازم عشان تجذب الناس تقولهم كلام فيه قلة ادب أو تشتم في حد 

"كلام إباحه , اتفرج ,استمتع, اضحك, قلد, قل في ادبك"

 هكذا قاعدتنا

 مي طارق اسماعيل

ديسك علا على عمر على
خالف تُعرف

"هنخرج فين يا جماعة ؟" ، أكتر سؤال ضيع مصير خروجات كتيرة آه والله .. فاكر كده كام مرة حاولت ترتب خروجة مع أصحابك وفي الآخر باظت ؟ ؛ لازم يكون فيه حد معترض على المكان أو الوقت أو اليوم .
بس عمرك سألت نفسك ليه لازم كل مرة تقعدوا تأجلوا فيها خمسين مرة لحد ما ربنا يسهلها و تظبط ؟!! مش القدر ، لأ أنا هقولك ؛ عشان عمرنا ما بنعرف نتفق على حاجة واحدة أبداً ، لازم تلاقي أي حد يعترض على أي حاجة وخلاص ، المهم انه يعترض و كأن الناس دي ماشية بمقولة "خالف تُعرف" ؛
يمكن عشان يثبتوا لنفسهم ولبقية الناس إن عندهم شخصية ، أو يمكن عشان اللي فيه طبع صعب يغيره.. الله أعلم !!!
(مثال الخروجة) مثال بسيط من أمثلة كتير أوي في حياتنا ومواقف بنواجهها كل يوم .
أنا مش ضد إن الواحد يعترض على حاجة مش عاجباه ، ومؤمنة جداً بمقولة “الاختلاف في الرأي لا يفسد للود قضية" ، وإن مش من حق حد يحجر على رأيك أويجبرك على حاجة إنت رافضها , بس فيه مواقف بتجبرك تتخلى عن حاجة عشان حاجة تانية ؛ لإن مش كل حاجة لازم تبقى على مزاجك ،وزى مانت عايز وخلاص .
حُط نفسك مكان الناس التانية وتقبل آراءهم , وفكر فيها .. يمكن تكتشف بعد كده إن هما اللي صح وانت اللي كنت غلط ؛ أصل مش عيب إنك تعترف بخطأك هي الدنيا إيه غير إنك هتفضل تتعلم لحد آخر يوم ليك فيها ؟؟؟؟.

Top of Form

مي احمد

ابرع كدبة

كدب فى كدب، الناس بقى من طبيعتها الكدب ، بقى فى دمهم . اول ما الانسان بيتولد بيبقى انسان نقى ، صافى و صادق ، مخلص ،عنده ضمير و احساس بس مش عارفة الانسان لما بيكبر بيجرى له ايه؟!

معدل النفاق بيرتفع ، الضمير بيموت ، الاحساس بينعدم و السواد بيملا قلبه و الكدب بيبقى زى المية و الهوا مبيقدرش يعيش من غيره ( طبعاً مش كل الناس كدابة بس نقدر نقول الاغلبية العظمى منهم كدابين ) مش هكون ببالغ لو قولت ان فى ناس بتكدب كل يوم اكتر من مرة . ايه الناس دى !! بفكر يعملوا مسابقة “لأبرع كدبة “ نشوف مين احسن واحد بيكدب فى مصر متهيألى الإقبال هيكون اكتر من الإقبال على السلع الاستهلاكية هيبقي طابور التقديم يفوق طابور العيش بمراحل متهيألى ممكن طابور التقديم في مسابقة الكذب يدخل موسوعة جينيس للأرقام القياسية المهم هنعمل المسابقة نشوف مين “اكثر كذباً من الآخر “ لحد ما نصفيهم واحسن و ابرع واحد في الكذب هياخد جايزة طبعاً و هيتشهر اكثر من نجم صوت الحياة ولازم تكون الجائزة قيمة تشجعه وتشجع غيره على مواصلة الكذب في شتى المجالات والاماكن ومع كل الاشخاص بلا استثناء وبعد كدة نخلى المسابقة دولية و ناخد واحد من كل بلد ونصفي بينهم لحد ما يبقى واحد من كل قارة و طبعاً في الآخر هنحصل على ابرع و اتقن كداب في العالم !! اعتقد المصريين ممكن ياخدوا المركز الأول أو على اقل تقدير ممكن يوصلوا لنهاية التصفيات ، التصفية بين القارات . ياه مصر بقت بتنافس في المسابقات الدولية العالمية الواحد مش مصدق إلا و ايه مش اي مسابقة دى للكذب لا تقولى كو رة و لا ملاكمة ..هو الكذب ، الكذب إللى بيأكل عيش في الزمن دة ما هو اللي مبيكدبش بيروح ورا الشمس و بما انهم فئة قليلة فمش مهم يروحوا فين .. يبقى الناس تكدب احسن ..

الكذب .. صناعة يومية عند كثير من الناس من كل الفئات و الأجناس و الاعمار بس يا تري الناس اللى بتكدب دى بتحس بإيه ؟ الإنسان اللي بيكدب دة شعوره بيكون ايه لما بيكدب على انسان تانى ربما يكون كداب و ربما لا ؟ طب هى كل الناس تستاهل ان غيرهم يكدب عليهم ؟ والناس اللي بتكدب على نفسها دى بتكدب ليه يا ترى ؟! اكيد عايزة تهرب من حاجة ، واقع هى فيه ورفضاه بس مين فينا بيختار نصيبه ولا بيحدد مصيره ! مافيش حد “الإنسان مصير مش مخير“ كان نفسي ادافع عن الناس اللي بتكدب على نفسها دى بس للأسف دة كدب من نوع خاص كل اللي اقدر اقوله ان الكذب على النفس دة ميزة عند ناس و بكدبها على نفسها بترتاح و فى ناس تانية بتبقى خايبة و مبتعرفش و مبتقدرش تكدب على نفسها و خد من دة كتير . ملناش دعوة بالناس اللي بتكدب على روحها علشان دي ناس اغلبهم مش مرتاحين خلينا مع الناس التانية اللي بتكدب و الكذب عندهم شئ عادي يا ترى بيكدبوا ليه ؟ ايه ذنب الناس اللى بتثق فيهم ويكتشفوا انهم في الآخر بيكدبوا عليهم ؟؟؟ ما هو اللي بيكدب دة ياما عايز يخرج من مشكلة ياما عايز يحط غيره في مشكلة ياما بقي يكون بيعمل خير و عايز يصلح بين الناس “وقليل ما هم “ بجد اتمنى ان نسبة الكدب تنخفض والناس ترجع زي زمان صادقين و مخلصين . ياااه لو الاخلاص و الصدق يرجعوا و الله الواحد يرتاح بس اقول ايه “ليس كل ما يتمناه المرء يدركه “ “و تأتي الرياح بما لا تشتهي السفن“ و “اللي راح راح يا قلبي“ “و الله يعوض علينا“ و تصبحوا على خير ....

منى اسامة هلال

ليه يا بنات

كل واحد بقى بيسأل نفسه ليه البنات بقت كدة ازاى زمان كانت البنت ليها قيمتها فعلا و دلوقتى البنات بقت بتجرى ورا الولاد بتعمل فى نفسها كل حاجة ممكن تعملها عشان تلفت نظروا تلبس ديق تلبس لبس ملوش علاقة بالمكان او المناسبة المهم يكون ملفت و خلاص و حتى لو محجبة مش بتهتم بحجمها و انها تلبس لبس مناسب معاها المهم انها تبقى "موزة " و فى الحقيقة انها بتبقى " جثة " و تمشى على الارض و كأنها بتقول " يا أرض اتهدى ما عليكى أدي " و لو وصل بيها الموضوع عشان تلفت نظروا تروح و تطلب رقم التليفون او تتلكك بأى سؤال تسألوا تفتح معاه كلام لأ و وصل الموضوع معاها كمان انها لو عدى واحد من ادمها تعكسه " ايه يا موز " " يا باشا انت عسل " " ايه يا قمر " و حاجات تانية كتير , خلوا الولاد عندهم نظرية ان" البنات على أفى مين يشيل " , و انه لو شاوير كدا على اى واحدة هتترمى تحت رجلوا و اى واحدة بسهولة هيظبتها و بسهولة هيسبها و يشوف غيرها , بجد ازاى البنت رخصت نفسها كدة بعد ما كان الشاب زمان يدور و يلف حولين نفسه و يفكر ازاى هيقلها "بحبك" و يعمل ايه عشان يلفت نظرها و بصعوبة بيقدر يصرحها بحبه و يتأدملها و يجوزها لانه عشان تعب للوصول ليها قدرها و شفها انها متنفعش تبقى غير مراته و شريكة حياته , تعالوا بقى نشوف دلوقتى بيحصل ايه البنت بتوفر على الشاب خطوة ازاى هيقلها " بحبك " و تقولوا هى عادى ماهي مش مهم ما هما الاتنين واحد , بتتطلب " الاكونت " على الفيس بوك او لو ياريت بقى لو عندوا " بيبيأم " تبقى السعادة غريبة , بيتعرفوا على بعض و تبدأ الخروجات و السهر و احيانا يطلع الشاب ابن ناس و يجوزها و احيانا يسبها و يشوف غيرها و فى الغالب بيكون الاعتقاد التانى هو الاوقع لأن الى جيه بسهولة هيروح بسهولة و لأن فعلا "  البنات بقت على أفى مين يشيل " , هسيبلقوا انتو الاجابة على سؤال العنوان يا ترى ايه السبب الي خلى البنت بقت كدا ؟؟...

مصطفى صابر احمد

سياسة اخر زمان

طبعا الكل متابع حلقات مسلسل (سياستك يا مصر) اللى مدة الحلقه فيه بتوصل 24 ساعه يوميا بدون فواصل اعلانيه اللى محقق اعلى نسبة مشاهده و انتشار

و توزيع بين كل وسائل اعلام الكوكب ما شاء الله ربنا يزيد و يبارك  عندنا مثلا قناة (الجزيره مباشر مصر) اول قناه اخباريه متخصصة لدوله بعينها فضيالنه يعنى ليل نهار مصر و اخبار مصر و احداث مصر و تحليل احداث مصر حتي اما مصر بتنام بتسهر تحميها يعينى و طبعا معاها من اعلامنا المبهر (النهار , cbc, الحياه , التحرير , المحور) و دول اللي بيصدعوا دماغنا بالحياد و الموضوعيه و مع كل دول ظهرت سلسلة قنوات التت السياسي حصريا على قنوات (الحافظ , الناس , الرحمه ) و كمان باسم الدين بس بصراحه و الشهاده لله كلها حياد مليان زعيق و شتيمه و دفاع عن جماعة الريس و من كتابهم و سنتهم و شريعتهم زي مشايفنها و بمناسبة سيرة الريس احب اوضح انى المسلسل ده ليه ابطال عندنا طبعا في مقدمتهم دور رئيس جمهورية مصر الحقيقي محمد بديع صاحب اكبر واهم دور خفيفى المسلسل و دور المساعد الأول لرئيس الجمهوريه خيرت الشاطر و ادوار مستشاريين رياسة الجمهوريه (البلتاجي , العريان , مالك , الجزار) و طبعا مننساش المتحدث الرسمي باسم الرئاسه محمد مرسي صاحب الدور الأكثر ظهورا والأقل تأثيرا و مع كل دول لسه في اعضاء الاخوان الحزب و الجماعه مع اخوات الجماعه و اقزام الاخوان بس المسلسل فن و الفن بيحتاج صراع والصراع ميظهرش الا لو فيه صح و غلط الا اما يبقي فيه خير و شر الا اما يبقي فيه اخوان وجبهة الخراب طبعا فى مقدمتهم ادوار زعمائها (حمدين صباحي ) الشهير ب"زعيم الاباصيري" اللي معملش حاجه قبل ولا بعد الثوره غير انو خد التالت

في ترتيب الانتخابات بدون بوسترات ابو اسماعيل اللي وصلت جوا بيوت المشاهدين ولا خطب مرسي اللى صدعت دماغ المشاهدين و اللى طلع بيحفظها ليه رئيسه المرشد مع حمدين الفاشل ده عندنا البرادعى و طبعا قبل مكتب عارفين ايه هو اسم والد البرادعي معروفه مش صعبه (البرادعي العميل) و طبعا دوره زي مبيقول الخير جوه المسلسل انه (خرب العراق و جي مصر يكمل الباقي) و كده فاضل عمرو موسي و طبعا عارفين اسم جده (عمرو موسي الفلول) و ده اكبر ممثل فى المسلسل بعد ما المسلسل القديم خلص دخل فى المسلسل الجديد (شاطر شاطر يعنى مش اي حاجه) بس دول ناس كبيره و نظريه اوي مش هتعمل حاجه احنا عايزين المسلسل يولع و يشد الجمهور عايزين حاجه كده زي بروسلي كده حاجه فيها حركه ايوه هى الحركه حاجه فيها اكشن واثاره احنا عايزين صراع بجد و عشان كده المسلسل بيضم ادوار لمجموعات شبابيه متحمسه واعده كده منهم للخير حازمون و مليشيات الاخوان و الجماعه الاسلاميه و منهم فى الشر الالتراس و الاشتراكيون الثوريون و اخيرا البلاك بلوك كده بقي تحلو الفرجه و المسلسل ينجح و يشد الجمهور و تبدأ بقي حلقات كل يوم صف الخير يشتم فى الشر و اتهامات زي ( العماله  , الخيانه , التمويل , دعم الفوضي ) مع شوية وصف بقي لأبطال الشر ( علمانين , ملحدين , كفار , مشركين , شيوعين , مخربين , ضد الاسلام و المسلمين , صهيونى , يدعم المخطط الاسرائيلى ,ماركسيين) فالشر يسكت ازاي يعنى هوه دوره صغير ولا ايه لا ده ليه جمهور بردوا فيرد بنفس الطريقه ( متأسلمين , زي النظام القديم , التجار بالدين) و تبدأ مشاهد الأكشن (مليونيات , اشتباكات , مسيرات , مظاهرات , حرائق , ملوتوف , قنابل غاز , خرطوش , سحل , تحرش , دم , جثث , اصابات ) و تنتهي الحلقات كل يوم بعد مكل طرف يتعب من جهد الشتيمه و مجهود الاكشن ليسود صمت و غياب دائم لدور المتحدث الرسمي باسم رياسة الجمهوريه محمد مرسي .. هم مش شايفين اللى المسلسل فيه من افتعال و تكرار و دمويه و عنف و تكلفه باهظه لديكورات المسلسل و موت لأبطال

واعدين و بقاء لأبطال مفتعلين .. هم عايزين ايه ؟ هم مش عايزين المسلسل ينتهي نهايه سعيده ليه ؟ ليه مصممين على الخلاف والشتيمه و الاشتباك ؟؟!! ليه مش عايزين مره واحده بس يخلوا المشاهدين يناموا مبسوطين عندهم امل فى حلقة بكره انها تكون احلى و احلى ؟؟ ليه المسلسل مبدأش ولا اتعمل زي ما المشاهدين عايزين

 ؟؟ مين قال ليهم انهم احرار فيه و لا حتي من حقهم يقرفونا بنفس الحلقات كل يوم ؟؟ بس المشاهدين لو صابرين هييجي يوم و هيعملوا زي معملوا فى

المسلسل اللى قبلوا و يحظروا عرضه تماما .

فاطمة السعيد

خلة وفيها زيتونة 

قاعد فى أمان الله فى الجامعة لا بيا ولا عليا،الجو جميل و مفيش أى حاجة مش عادية،كل شىء طبيعى،و فجأة! كائن غريب مريب داخل عليك، و بتاخد دقيقة كده على ما تقدر تحدد هو عبارة عن إيه، بنت؟!! دى بنت بنى ادمة يعنى،طب عاملة كده ليه؟!!

طب نمسك حاجة حاجة فى الكائن ده،،

نبدأ بأول حاجة و أكتر حاجة هتشد انتباهك،،راسها،او بالذات الطرحة يعنى، هى بصراحة مش طرحة على شعرها، ممكن نقول إنها طرحة فى شعرها!! الأصة باينة من ادام و شعرها كله نازل من ورا! 

اه كمان هتلاقى الطرحة مليانة ترتر،شخاليل و كرانيش و كل الحاجات الىىىىى ديه !!

و مش بعيد تكون بتنور فى الضلمة! يعنى ال طرحة ديه بالنسبالها مجرد ديكوراشن  مش اكتر !

الموبايل جوه الطرحة ليه مش عارفة ليه،ما إيدك موجودة يا أمى متشلتش يعنى!

نسيت اقولوكوا إن الطرحة ديه بتبقى ممتدة مترين لفوق و يمكن اكتر!

ليه و ازاى ؟؟ الله أعلم!

وشها،، 2 كيلو بويا، ايشادو الوان الطيف بس بتلمع! رمشها مقشات، و بقها أحمر زى ما تكون لسه اكله حد و جاية، بس كده، عادى يعنى فى إيه!

اللبس،، تلتت اربع عشر الوان داخلين فى بعض ملهمش اى ستين علاقة ببعض! او بادى سبونج بوب و بنطلون فسفورى من وحى الطبيعة،كعب 15 سانتى و الخلخال الأصلى!

ده طبعاً غير الإكسسوارات اللى فى كل حتة،رقبتها، إيدها، معتقتش!!

من الاخر اعتقد ان اكتر اسم ملائم للكائن ده هو.. خلة و فيها زيتونة !!

انجي مجدي ظريف جرجس

عادات الشعب المصري

المصري هو اللّي بيفهم في الطب ويشخص المرض ويوصفلك الدوا وبيفهم في النقاشة والكهربا وتصليح العربيات والطبيخ والسياسة والكورة وهو أبيض ياورد

بيحط الريموت كونترول في كيس بلاستيك كعادة فرعونية

يقف يتكلم على الباب نص ساعة بعد إنتهاء الزيارة والسلام

لمّا تفتح نملية المطبخ هتلاقي عنده عشرين برطمان بتاع مربى فاضي بقالهم سنين ومازال مُصِر على جمع المزيد

ييجي بعد معاده بساعتين ويفتكر إن ده عادي

لسه عنده إصرار إنه يتكلم بصوت عالي في التليفون لما تكون المكالمة دولية عشان التاني يسمعه

بيعتبر نفسه أفضل واحد في الشرا والفصال وبعد كده يكتشف إن الحاجة في المحل

اللي جنبه أرخص من غير فصال

بيحتفظ بأكياس محلات اللبس والأحذية وورق الهدايا تحت مرتبة السرير لسنوات وما بيستخدمهاش

عنده صينية مكسرات متقسمة لتلات او أربع أقسام لزوم المزاج وعمره ما إستخدمها

ممكن يعدي التلاتين ولسه عايش مع أمه وأبوه وماعندهومش مشكلة

بيشتري قبل الفطار في رمضان مواد إستهلاكية أصلا موجود عنده في البيت لسه ماستخدمهاش

بيكون عنده شواية لزوم الرحلات أقصى استخدام لها كان مرة واحدة في العيد

لازم يدخل من باب المترو زى ما يكون داخل يقبض على تاجر مخدرات حتى لو كان المترو فاضى

بيكون مشغول بقيمة التيبس أو البقشيش طول العشا ياترى ربع جنيه ولا نص جنيه

برده بيتخانق ساعة دفع الحساب بحرارة شديدة على إنه هو اللي لازم يدفع

بيفرش ملاية سرير على طقم الأنتريه عشان يفضل نضيف لما ييجي ضيوف

ومابيشيلهاش لما ييجوا

والأهم إنه اللي بيحب يسخر من نفسه ومن بلده وحكامه بس مايطيقش حد تاني يسخر منهم ، وساعتها بيفرش له الملاية

  

 أميــــنـــه عــــادل مـحـمـود     

الدليل العصرى للطالب المصرى 

يعنى إيه طالب مصرى؟؟؟

يعنى بيرهبوه من كى جى وان و يقولوله إوعى لحسن ناخدك أوضة الفيران ، إوعى لحسن نجبلك أبو رجل مسلوخه لحد ما جالوا امراض نفسيه مبكره.

يعنى يحفظ و يصم مناهج متخلفه عقيمه بإسم التعليم ! ، و الله ظلموا التعليم معاهم .. و طبعا تحت شعار احفظ أكتر .. تنجح أكتر.

يعنى يتفحت مذاكره فى الثانويه العامه و يتبهدل دروس خصوصيه و أهله يدفعوا دم قلبهم و يتمرمط تحت شعار "شد حيلك بس انت فى ثانوى عشان ترتاح فى الجامعه" - كذبه كبيره - و فى الآخر تجيلو إمتحانات زى وش اللى حاطينها و بمنتهى البرود يكتبولوا فى آخرها الجمله المستفزه الشهيره "مع أطيب الأمنيات بالنجاح و التوفيق".

يعنى يتضغظ عليه ضغط رهيب من أمه و أبوه و إخواته و خالاته و عماته و طنطاته و أمة لا إله إلا الله كلها عشان يدخل كليه هو مش حاببها لمجرد إن مجموعه جايبها ، مبيبقاش فاضل غير عم عبده البواب يقوله خش يابنى ... أى كليه مممممم نقول مثلاً هندسه.

و فى العكس يا عينى .. اللى كان حلمه يدخل هندسه و هدم حلمه ما يسمى بالتنسيق اللعين حتى لو كان جايب الدرجه النهائيه فى الماده اللى بتأهله لكلية الهندسه .. اللى هى الرياضيات ، إنما بقى إختبارات قدرات و الجو بتاع أوروبا و الدول المتقدمه ده لأ إنسى يا عمرو !

و فى حالة الطالب الأولانى صاحبنا المضغوط عليه 90% بيستسلم لضغطهم عليه و بيعصر على نفسه لمونه و بيدخل هندسه و بيفشل فيها و أولاً هو أول حد بيخسر و ثانياً المجتمع بيخسره فى المجال التانى اللى كان نفسه يبدع فيه.

و فى حالة الطالب التانى بيدخل كليه غير هندسه اللى مبيحبش حاجه غيرها و لإنه مبيحبهاش بردو هيفشل فيها و بردو المجتمع بيخسره...          لــــكِ الــــلــــه يــــــا مــصــــــــــر !!   

الله يرحمك يا رجوله

لما تلاقى واحد مستحل بنات الناس بص و لمس يبقى الله يرحمك يا رجوله.

لما تلاقى واحد بيصاحب مروه و أما يزهق من مروه يفكسلها و يصاحب نهى و أما يتخنق من نهى يحلقلها و يظبط هدير و يعشم البنت من دول و هو ناوى يخلى بيها و تلاقيه بيخاف على أخته زى عينيه و مانعها تكلم جنس ولد يبقى الله يرحمك يا رجوله.

لما تلاقى واحد مبرشط على مرتب مراته لمجرد إنها ست جدعه و كرماً منها موافقه تشارك فى مصروف البيت مع العلم إنها مش ملزمه خالص تعمل كده يبقى الله يرحمك يا رجوله.

لما تلاقى واحد رامى كل الحمل على مراته و مبيشاركش فى تربية الأولاد كأنهم أولادها هى بس يبقى الله يرحمك يا رجوله.

لما تلاقى واحد نازل الجامعه مخصوص علشان يجيب سيرة اللى رايح و اللى جاى و يتريق على خلق الله يبقى الله يرحمك يا رجوله.

لما تلاقى واحد بيعامل والدته بكل قسوه و بيقلب قطه سيامى قدام صاحبته يبقى الله يرحمك يا رجوله.

لما تلاقى واحد لابس بنطلون أحمر و أصفر و أخضر و مشمره يبقى الله يرحمك يا رجوله.

لما تلاقى واحد زى النطع شايف واحده بتتهان و بيتحرش بيها واحد تانى و هو واقف زى البجم أو بيرمى اللوم عليها يبقى الله يرحمك يا رجوله.

لما تلاقى واحد بيضرب زوجته أو بيهينها قدام الناس فى الشارع أو حتى و هم فى بيتهم و فاكر نفسه كده دكر و حمش و راجل يا حسام يبقى الله يرحمك يا رجوله.

لما تلاقى رجاله بشنبات قاعدين فى المواصلات و سايبين السيدات و كبار السن يقفو يبقى الله يرحمك يا رجوله.

الــــلــــــــه يــــرحــــمــــــك يــــــــا رجــــــولــــــه !!!!

 أسماء محمد حسن سعد

لبس الرجالة

دايما وانا فى الجامعة بفضل اتفرج على الاولاد ولبسهم الجميل والشيك اوى اللى احنا بنشوفة دة

زمان كان بيعجبنى اوى لبس الولاد واقول دة اشيك من لبس البنات دة زمااااان ماشى بس دلوقتى ماشاء الله الصراحة مفيش فرق بين الاتنين

دلوقتى بشوف الولد بقول هو دة ولد يعنى راجل ؟!!!!!

بحس ان انا ارجل منه لابس سلاسل كدة وحاجات غريبة والبنطلون متنى من تحت لأ واييييييه الجزمة بفيونكة ببقى عايزة انت بس فاضلك خلخال ولا الالواااااااااااااااااان يالهوووى بحس انى وافقة فى جنينة فى فصل الربيع لما بنزل الجامعة بحس انى هموت بالسكتة القلبية من اللى بشوفة

فين الرجولة فين الحشمة هى كل حاجة كدة نقلدها وخلاص من غير تفكير !!!

يعنى دول الرجالة اللى هيبنوا البلد هو اه مش الكل كدة بس انا بتكلم عن الجيل اللى طالع بجد كل جيل اسوأ من اللى قبله بجد ايه الهيافة والسطحية اللى

احنا وصلنا ليها دى وايه الالفاظ اللى احنا بنسمعها دى بالاب والام اللى كل ذنبهم انهم خلفوك عشان يتشتموا من اصحابك وانتوا بتهزروا ربنا يعوض علينا وصدق اللى قال الرجالة ماتوا فى الحرب …………..

ساره هشام طه محمود

ان شاء الله و الف الف مبرووك

جبتي الصيني , جبتي المفرش ؟؟؟  طب كتبت القايمه و النجف و الستاير؟ كل دي حاجات بنبني عليها الجواز في مجتمعنا المصري من غير ما نفكر في الاول هل هما متفهمين مع بعض هل هما ممكن يعرفوا يعيشوا مع بعض من غير ما يزودوا معدلات الطلاق الموجودة دلوقتي ؟؟؟؟

احنا المشكله ان احنا عمرنا ما فكرنا ايه سبب زيادة معدلات الطلاق في مجتمعتنا ؟؟ مش ممكن تكون من طريقة تفكرنا الغلط في مفهوم الجواز اللي بنفكر فية بمبدأ الدفع و العادات و التقاليد اللي مشين بيها من غير اي لازمه  كل ما تدفع اكتر كل ما تتفتخر قدام الناس اكتر ,, و كل ما تقفل علي بنتك اكتر كل ما تغلي اكتر  ..

طب بالنسبه لأهل البنت لو العريس هو ابنك هتبقي عايزه كل التسهيلات لابنك صح؟؟

يبقي اكيد احنا المشكله فينا و في معتدقدتنا الغلط و في الاخر نقول ليه نسبة العنوسه بتزيد  و ليه مفيش بنات بتتجوز و يا تري فين ابن الحلال ؟ ما اكيد ابن الحلال اختفي او بيحاول يجمع الفلوس اللي هيتجوز بيها الانسة الكريمه  و ده برده السبب الاساسي اللي بيفركش الكتير  من الجوازات قبل ما تتم . و في الاخر تيجي الناس تقولك الف الف مبروووك .

رحاب صابر

حكم و أمثال الأمهات

الحكم:

الأمهات ما شاء الله عندهم قدرة غريبة على أنهم يقولوا حكم و جما غريبة حتى لو مش ليها لازمة بطريقة مش طبيعية يعنى عندك مثلا شوية المواقف دى مثلا ولد بيقول لماماته: ماما مش هتخلصى الاكل بقى أنا جعان تقوله: " جاعة الاملة فى رأسك "

أو مثلا عايز ينام و الوقت مش وقت نوم تقوله " نامة عليك حيطة " ، أو عايز ياعب مع ابن الجيران و هى مش عايزه يلعب

تقوله : " لعبة نفسك على عودك " ؛ بس بقى و ده جزء من أقوال الامهات اللى مش ليها أى معنى بس بتتقال و خلاص.

الأمثال:

نيجى بقى للأمثال و دى هنلاقى منها كتيييييير أوى بقى هتلاقى نفسك كل جملة بتقولها يطلعولك عليا مثل زى المواقف دى مثلا لما بنتها تيجى فى يوم بتعيط علشان اتخنقت مع خطيبها فتقولها اه سبيه يا حبيبتى قال على رأى المثل " خالتى و خالتك و تفرقوا الخالات " ، أو بتتخانق مع بنتها علشان مش طبقت الغسيل فتقولها: أنا اسفة يا ماما معلش مش خدت بالى ، تقولها : ليه قال على رأى المثل " اللى ميشوفش من الغربال يبقى أعمى "

أو فى يوم مثلا اتفقت مع بنتها أنها ترتب الاوضة و البنت نسيت

تقولها ما هو صحيح " كلام الليل مدهون بزبدة يطلع عليه النهار يسيح "

فى موقف تانى مثلا بنتها جت من بره متضايقة و سالتها مالك و قالتلها مفيش تقولها طيب " يا خبر بفلوس بكرة يبقى بلاش "

أو " بكرة نقعد حنب الحيطة و نسمع الظيطة "

فى موقف تانى برده اتنين متجاوزين و يوم اتخنفقوا قدام عيالهم و بعد كده جت اتخنقت مع عيالها تقولهم ما هو صحيح " اللى جوزها يقولها يا عورا و لادها يلعبوا بيها الكرة "

أو لو بنتها جتلها فى يوم و قالتلها جوزى فى طبع مش بحبه و مش عارفة اغيره تقولها بصى يا حبيبتى لازم تعملى بالمثل اللى بيقول " ابنك على ما تربيه و جوزك على ما تعوديه "

أو فى يوم مثلا بتذاكر لابنها و هو مش فاهم منها تقوله على رأى المثل " هنفضل نعلم فى المتبلم يصبح ناسى "

بس بقى يا سيدى و ده جزء مبسط أوى من أمثال الامهات اللى طول النهار و الليل بيقولوها؛بس

هل يا ترى هما كلامهم

صح و لا غلط ؟!